IVISAN, CAPIZ- Nagapabilin pa sa karon ang duwa ka mga lalaki sa Roxas Memorial Provincial Hospital matapos nga ginpanglabo sa isa ka bilasyunan sa Sitio Sayuyan, Barangay Malocloc Norte, Ivisan, Capiz.
Ang mga biktima amo sanday alyas ‘John’, 21-anyos kag alyas ‘Jason’, 25-anyos nga lunsay residente sang Sitio Tagikan, Barangay Cabugao sa amo man nga banwa. Samtang ang ginatudlo naman nga suspek amo si alyas ‘Ernie’, 42-anyos, construction worker kag residente sang Sitio Sayuyan, Barangay Malocloc Norte sa nasambit nga banwa.
Sa interview sang Bombo Radyo kay Police Major Ruby Magallanes, Hepe sang Ivisan Municipal Police Station, iya ginpahayag nga nagpadulong sa isa ka bilasyonan ang mag-abyan malapit sa ila nga barangay.
Sa nasambit nga bilasyunan, naghuygo ang mga ini, apang sa katunga-tungaan sang huygo may nagluntad nga indi pag-intindihanay sa tunga ni alyas ‘Jayson’ kag sang utod sang suspek rason nga nag-init ang tensyon sa tunga sang duha.
Dugang pa sini, nagpatunga ang suspek nga ginapahayag may bitbit nga bolo kag ginpanglabo ang mga biktima.
Bangud sa pagpanglabo, nag-angkon sang pilas sa ulo si alyas ‘Jayson’, samtang pilas naman sa tuo nga kamot ang naangkon ni alyas ‘John’ nga gilayon nga ginpadangat sa ospital.
Madasig naman nga nagpalagyo ang suspek matapos nga nakumiter ang amo nga hitabo.
Sa karon, nagapabilin ini nga at large kag nagapadayon man ang hot pursuit operation sang mga katapo sa Ivisan Municipal Police Station.
With a report from Bombo Jessa Mae De Los Santos
