ROXAS CITY – Nagpanawagan sa karon ang pamunuan sang Police Regional Office ukon PRO-6 sa publiko, labi na sa mga botante nga indi pagsuportahan ang mga kandidato nga nagahatag sang suporta sa New People’s Army ukon NPA sa maabot nga May 2019 midterm elections.
Sa interview sang Bombo Radyo Roxas kay Superintendent Joem Malong, spokesperson sang PRO-6, ginpahayag sini nga nagalaum sila nga indi man pagsuportahan sang publiko ang mga kandidato nga may kaangtanan sa illegal activities bangud indi sila sa gihapon makahatag sang maayo nga serbisyo sa mga pumuluyo.
Samtang ginkumpirma ni Malong nga may ginamonitor sila nga mga kandidato sa Western Visayas nga nagahatag sang suporta sa rebelde nga grupo.
Apang indi pa mahimo nga mapaguwa sa publiko ang pangalan sang nasambit nga mga kandidato bangud padayon pa ang ila nga validation.
