Mga progresibo nga grupo nagpatigayon sang hublag-protesta kadungan sang Araw ng Kagitingan

ROXAS CITY – Nagpatigayon sang hublag-protesta ang magkatuhay nga mga progresibo nga grupo sa Roxas City Public Plaza kadungan sang Araw ng Kagitingan.

Suno kay Celso Clarito, tigpamaba sang Bayan-Capiz, ang nasambit nga tikang ang isa ka pamaagi agud ila mapakita ang ila hugot nga pagpamatok sa mga programa sang administrasyon.

Ginpahayag pa sini nga kalakip sa ila ginasinggitan amo ang ila pagpamalabag sa pagsulod sang China sa West Philippine Sea.

Suno kay Clarito wala sang may ginahimo si Presidente Rodrigo Duterte agud protehiran ang teritoryo kag dunang-manggad sang Pilipinas.

Gindugang pa sini nga kasubong ginabaligya ni Presidente Duterte ang pungsod sa iban nga mga nasyon kabaylo sang iya Build Build Build program.