ROXAS CITY – May tagsa-tagsa ka pamaagi ang mga residente sang Barangay Lanot, Roxas City agud matapna ang pagduging sang lamok kag maamligan ang ila ikaayong-lawas batuk sa balatian nga dengue.
Ini ang nahibaluan sa ginpatigayon nga Bombo Patrol 101 sa Barangay sang Bombo Radyo News Team.
Suno kay Marlene Biclar sang Sitio Proper, adlaw-adlaw ini nagapaninlo sa sulod kag guwa sang ila balay bangud madamo sang lamok sa ila lugar ilabi na sa karon nga maulanon ang paniempo.
Ginatinguhaan man sini nga maula ang makit-an sini nga tubig sa mga butang nga may stagnant water agud indi pagpangitlugan sang lamok.
Suno naman kay Mary Lou Ubugan, matapos makaangkon sang balatian nga dengue ang iya duha ka mga kabataan, mas nangin responsable sila sa pagpaninlo sa ila nga palibot.
Ginpahayag sini nga adlaw-adlaw siya nagapaninlo ilabi pa nga madamo sang tanom sa ila nga palibot.
Ginatinguhaan man sini nga matinluan ang drainage sa ila lugar agud indi magbun-od ang basura.
Ginpahayag naman ni Nanay Josephine sang Craftsmen, matapos nga nakaangkon sang dengue ang tatlo niya ka apo, mas nangin mahalong sila ilabi na kun nagaduging na ang lamok sa maulanon nga paniempo.
Suno diri nga magluwas sa pagpaninlo, nagagamit sila sang mosquito net kag mosquito repellant kun gab-i.
Suno naman kay Manang Leslie, wala sang adlaw nga wala siya nagapaninlo sa sulod kag guwa sang ila balay bangud duha sini ka hinablos ang nagpositibo naman sa balatian nga dengue.
Ginpahayag sini nga bangud madamo sang kabataan sang ila panimalay, ginatinguhaan sini nga tinluan ang mga lugar nga mahimo teniran sang mga lamok.
