Pila ka mga senador ang nagpabutyag sang ila suporta sa pag-appoint kay Transportation Secretary Vince Dizon bilang bag-o nga tiglikom sang Department of Public Works and Highways (DPWH).
Kasunod ini sang pagbiya sa pwesto ni DPWH Secretary Manuel Bonoan.
Ginpahayag ni Senate-President Francis ‘Chiz’ Escudero nga handa ang Senado nga suportahan si Dizon, nagapangamuyo para sa iya kadalag-an bilang bag-o nga DPWH Secretary.
Nagalaum ini nga sa katapusan matapos na ni Dizon ang tanan nga nagapadayon nga korapsyon sa ahensya.
Sa pihak nga bahin, gindayaw naman ni Senador Jinggoy Estrada ang pagka-appoint ni Dizon sa DPWH.
Suno sa Senador, maayo ang performance ni Dizon sa DOTr, gani nagalaum ini nga mahandle man niya sang maayo ang DPWH.
Samtang, indi man mapunggan snag Senador angb pagkasubo sa pagbiya ni Bonoan bangud naghalin ini sa manubo nga pwesto sa DPWH tubtob nga nagsaka sa puwesto kag magabiya sa pwesto nga wala nagasabat sa mga kwestyonable nga proyekto.
Gindayaw man ni Senador Erwin Tulfo ang pag-appoint kay Dizon bangud suno sa iya nga sa sulod sang anum ka bulan sa DOTr, madamo na siya sang nahatagan nga akstyon.
Dugang pa sini, nagakadapat suno sa iya nga yara sa DPWH si Dizon bangud ang kadamuon sang mga reklamo angut sa flood control projects ang nagakinahanglan sang agresibo nga tiglikom kaangay ni Dizon kag nagalaum ang Senador nga sa idalom sang pagpamuno ni Dizon, matapos na ang pagkunsabo sang mga kontraktor, pila ka mga opisyal sang DPWh kag iban pa nga opisyal sang publiko.
Sa pihak nga bahin, ginpahayag ni Senador Joel Villanuevanga sa isa sa mga mabug-at nga buluhaton ni dizon subong amo ang pagpaninlo sa DPWH.
Mangin crucial ang iya appointment bangud ginhatagan siya ni Presidente Ferdinand Marcos Jr. sang bug-os nga pagsalig sa pagpanguna sa DPWH nga sa karon nagapangatubang sang kontrobersiya.
Ginpasalig naman ni Senador Villanueva nga ihatag nila ang ila bug-os nga suporta sa bag-o nga lider sang DPWH.
