ROXAS CITY, CAPIZ – Nagapanghakroy ang mga tricycle driver sa Roxas City bangud sa wala untat nga pagsaka sang presyo sang gatong nga nagatuga sang kabudlayan sa ila pangabuhian.
Sa interview sang Bombo Radyo Roxas kay Mr. Renato Caloyloy, isa ka tricycle driver sa syudad, iya ginpahayag nga bisan nagataas ang presyo sang gatong, wala sila sang may mahimo kundi ang magpadayon sa pagbyahe agud mabuhi ang ila pamilya.
Suno kay Caloyloy, indi lang presyo sang gatong ang problema kundi pati man ang pagdamo sang mga colorum nga tricycle nga naga-operate kag nagapabuhin sang ila pasahero.
Dugang pa sang natungdan, P400 na lang ang iya ginakita sa isa ka adlaw kun ikumpara sang una nga mas daku pa ang iya ginapauli nga kwarta para sa pamilya halin sa pagbyahe.
Mensahe sini sa iya mga kaupdanan nga tricycle driver nga magpadayon lang gihapon sila sa pagbakas sa pagbyahe sa tunga sang kabudlay bangud sa pagtinaas sang presyo sang gatong.
– With a report from Bombo Jessa Mae Siman De Los Santos
