Mga unod sang sako nga narekober sa Taal Lake, tul-an sang tawo – PNP

Ginkumpirmar sang Philippine National Police nga mga tul-an sang tawo ang mga tul-an nga narekober sa sulod sang sako nga ginhaboy sa Taal Lake sa Talisay, Batangas.

Suno kay PNP Chief Gen. Nicolas Torre II, ini ang resulta sang inisyal nga imbestigasyon sang ila PNP experts.

Gindugang sini nga posible may mga tul-an man sang sapat nga nalakip sa mga tul-an nga natukiban sa lugar.

Sa kabug-usan nga lima ka sako nga narekober sa Taal Lake, hugot nga gina-usisa ang mga ini.

Ini ang gindala na sa forensic group agud magpatigayon sang cross-matching sang DNA samples sang nadula nga sabungero.

Sa karon, 12 ka pamilya sang nadula nga sabungero ang naghatag sang DNA samples agud i-crossmatch sa natukiban nga mga tul-an.