Ginkumpirmar sang mga otoridad sa Michigan, United States nga may duha ka ginbawian sang kabuhi bangud sa cyclospora outbreak, nga ginakabig nga una nga na-record nga fatal cases sang sakit nga tuga sang microscopic parasite sa nasambit nga pungsod.
Santo sa Michigan Department of Health and Human Services, pareho nga may kritikal nga balatian ang duha nga nautas ang kabuhi kag lunsay nakaeksperyensya sang intestinal illness kag dehydration.
Ginpahayag sang mga eksperto nga importante nga matumod ang ginhalinan sang outbreak agud malikawan nga madugangan ang kaso.
Ang Cyclospora ang isa ka microscopic parasite nga nagatuga sang cyclosporiasis, isa ka sakit nga mahimo magresulta sa diarrhea, pagsakit sang ulo, pagsuka-suka, kag iban pa nga gastrointestinal problems.
Natumod sang mga otoridad nga ang lettuce naggikan sa Mexico nga gina-serve sa mga fast food chain sang Taco Bell sa lima ka states ang posible nga ginhalinan sang outbreak, samtang padayon gihapon ang pagdiskubre sang iban pa nga posible nga source.
Santo sa Centers for Disease Control and Prevention (CDC), nagdangat na sa 6,707 laboratory-confirmed cases sang cyclosporiasis ang na-record sa bug-os nga Estados Unidos.
Sa Michigan naman, kapin 11,000 ka outbreak-linked cases kag 193 ang na-ospital may kaangtanan sa sakit.
