SIGMA, CAPIZ- Arestado ang isa ka lalaki matapos nga nakuhaan sang ginapatihan shabu kag armas-luthang sa ginpatigayon nga buybust operation sang mga katapo sang Sigma Municipal Police Station sa banwa sang Sigma, Capiz.
Ang arestado amo si alyas ‘Wilmer’, yara sa legal nga pang-edaron kag residente sang Barangay Amaga sa amo man nga banwa.
Sa interview sang Bombo Radyo kay Police Captain Mark Anthony Garcia, Hepe sang Sigma Municipal Police Station, iya ginpahayag nga pamaagi sa isa ka informant, natigayon nga maaresto ang amo nga persona.
Dugang pa sini, madugay na nila ini nga ginamonitor bangud nga nalakip ini sa BADAC Watchlist sang iya nga barangay kag wala naman suno sa iya ini sang record nga nagapalupok sang armas-luthang magluwas sa nagapatigayon ini sang iligal nga mga aktidibad.
Nakuha sa paghinakop sini ang walo (8) tanan ka sachet sang ginapatihan shabu, isa ka unit sang armas-luthang nga 12 gauge improvised shotgun pistol type, tatlo (3) ka mga live ammunitions, sling bag, kag P23,966 nga cash.
Nagapangatubang ini sa karon sa mga kaso nga paglapas sa Republic Act 9165 ukon “Comperehensive Dangerous Drugs Act of 2002” kag kaso sa paglapas sa Republic Act 10591 ukon “Comprehensive Firearms and Ammunition Regulations Act”.
Sa karon, nagapabilin ini sa kustodiya sang Sigma Municipal Police Station para sa nagakaigo nga disposisyon.
Interviewed by Bombo Sunnie Mae Batencila
