ROXAS – Dead on arrival sa Bailan District Hospital ang isa ka lalaki matapos ginluthang sang iya bayaw takna 8:09 kagab-i, Enero 22, 2024 sa Barangay East Villaflores, Maayon, Capiz.
Ginkilala ang biktima nga si Mark Dordas, 33-anyos samtang ang ginatudlo suspek ang ginkilala nga si Jonel Carillo, 34-anyos, negosyante lunsay residente sang nasambit nga lugar.
Sa imbestigasyon sang Maayon Municipal Police Station, ginaalegar nakit-an ni Carillo nga ginlampusan ni Dordas ang iya asawa (utod sang biktima) sang matig-a nga bagay.
Bangud sini, hinali nga ginluthang ni Carillo ang biktima gamit ang ginaalegar calibre .45 nga armas-luthang sa nagkalain-lain nga parte sang lawas sang biktima.
Wala naman natumod kun yara sa impluwensya sang makahulubog nga ilimnon ang biktima kag suspek sang natabo ang insidente.
Madasig nga nagpalagyo sa lugar ang suspek matapos makumiter ang krimen.
Sa karon, gina-ayam na sang kapulisan ang suspek samtang nagapadayon pa ang imbestigasyon angut sa insidente.
