ROXAS CITY – Nagapabilin nga missing ang isa ka lalaki matapos nga nagtabok sa tubig-baha sa Sitio Bugha-an, Brgy. Dulangan banwa sang Pilar.
Ginkilala ang lalaki kay Rodulfo Bacolod, residente sang nasambit nga barangay.
Ginapahayag nga maga-evacuate kuntani ini kaupod ang iya pamilya apang naglaong ini sa iya asawa nga magakuha sang relief goods nga ginapanghatag rason nga nagpamilit pa ini nga magtabok sa mabaskog nga tubig-baha.
Kun matandaan, makita sa video nga nagadalagan pa ini pa tabok apang pag-abot sa tunga-tunga madasig ini nga nadala ukon na naanod sang tubig.
Mahibaluan nga nagpatigayon sang search ang rescue operation ang mga katapo sang Pilar PNP, BFP, PCG kag Pilar MDRRMO sa posible masangitan sang amu nga lalaki.
Apang, wala gid nila ini makita kag tempraryo nga gin-untat ang ila operasyon kagabi kag magapadayon naman subong nga adlaw.
