Patay ang isa ka mister matapos gintiro ini sa ulo sang kalapit-balay nga nagsita sa iya live-in partner sa Antipolo City, Rizal.
Ginkilala ang biktima nga si Aries Tuando, 45-anyos sang Unit 6 Sitio Sto. Niño, Brgy. Mayamot, Antipolo City samtang arestado ang suspek nga si alyas “Chok-Chok”, 41-anyos, nga amu ang nagtiro sa biktima.
Nakapalagyo naman ang isa pa nga suspek nga ginkilala kay alyas “Dexter” nga amu ang ginapahayag nga may dala sang pusil nga gingamit sa krimen.
Nagaguwa sa imbestigasyon sang Antipolo City Police nga natabo ang krimen sa atubang sang balay sang suspek sa Sitio Sto. Niño alas-9:30 sang gab-i.
Antes ang pagpangtiro, nagapungko lamang ang biktima sa tupad sang isa ka tindahan malapit sa ila nga balay sang hinali nga nag-abot ang suspek kag sa wala mahibaluan nga rason, ginsita ang live-in partner sang biktima.
Nakit-an sang biktima ang natabo gani ginsaway ang suspek kag ginpangapinan sini ang live-in partner.
Apang, ginkaakig sang suspek ang ginhimo sang biktima, gani nagkuha ini sang armas halin sa bag sang iya upod nga si Dexter.
Gilayon sini nga gintiro sa ulo ang biktima kag madasig nga nagpalagyo matapos ginhimo ang krimen.
Nag-angkon sang patal nga pilas sa ulo ang biktima nga gintunaan sang iya kamatayon.
Gilayon naman nga nagpatigayon sang hot pursuit operation ang mga pulis kag naaresto ang gunman samtang padayon sa gihapon nga ginapangita sang otoridad si Dexter.
Narekober sang mga pulis sa posisyon sang suspek ang isa ka kalibre sang .38 revolver nga may tatlo ka bala nga amu ang ginapatihan nga gingamit sa pagpatay sa biktima.
