ROXAS CITY – Ginpaathag sang Metro Roxas Water District (MRWD) ang mga naeksperyensyahan nga water interruption sang pumuluyo.
Sa interview sang Bombo Radyo kay Mark Vincent Bernas, Public Information Officer sang MRWD, ginpahayag sini nga sila ang naga-abiso kun magpatigayon sang water interruption.
Masami nga rason sang water interruption kun may naiigo nga tubo sa mga road widening activities, telco companies kag excavation gani kinahanglan nila ihalin sa iban nga lugar ang linya kag ang pagkay-o sini ang nagadepende sa lebel sang samad sang tubo ukon leakage.
Suno diri, kinahanglan ang water interruption agud makay-o ang leak kag indi ini madali nga trabaho bangud kinahanglan pa ini tsekyaron kag i-evaluate rason nga madugay antes magbalik ang tubig sa tagsa ka panimalay.
Dugang pa sini, apisar magbalik na ang operasyon sang tubig, maeksperyensyahan sa gihapon ang mahinay nga pagtubod bangud malawig ang tion antes mapuno ang reservoir kag magbalik sa normal ang pagtubod.
Ginpaathag man ni Bernas nga ang rason sang malubog nga tubig matapos ang water interruption, kabangdanan sa nagmala nga distribution lines kun sa diin nagahuman ang mga sediments, apang suno diri temporaryo lang ini nga maeksperyensyahan.
Ginsiling sini, kun makaeksperyensya sang malawig nga paglubog sang tubig, gilayon magpadulong sa ila edipisyo bangud may yara sila sang libre nga serbisyo sa flushing.
Dako man suno diri ang ila kapyirdehan sa tion nga may mga leakage bangud ginakonsiderar ini nga revenue water ukon waste water kun sa diin ang ila ahensya ang nagabayad sini gani ang pagpanubo sang revenue water ang ila man pagatutukan.
Makaeksperyensya man sang pag-untat sang tubig kada gab-i bangud sa madamo nga nagagamit nga konsumidor kag may yara sila ginapatigayon nga pressure management kada alas 7:30 sang gab-i kun sa diin ginapatay nila ang valves agud makatipon sang tubig kag makagamit ang kadam-an pag-abot sang kaaganhon.
Importante ini suno kay Bernas bangud kun indi mapatay ang valves, posible nga maglupok ini kun sobra na ang tubig kag tunaan pa sang malala nga water interruption.
Panugyan sini sa mga konsumidor nga gilayon mag report sa ila kunmay leakage nga makita agud gilayon ini nila nga makadtuan.
