ROXAS CITY – Nagahulat pa sang resulta ang Municipal Agriculture’s Office sang dugang nga ginkuhaan sang blood samples nga mga baboy sa Barangay Canapian, Maayon, agud masiguro nga wala na sang mga apektado sang African Swine Fever (ASF).
Sa interview sang Bombo Radyo kay Ms. Evie Dizon, acting Municipal Agriculturist, ginpahayag sini nga magluwas sa ginahulat nila nga resulta sang dugang nga blood samples, ginmanduan man ang amu nga barangay nga magpatigayon sang checkpoint sa nagaguwa-pasulod sa ila lugar nga posible magpalusot sang karne sang baboy.
Agud masiguro, pagakuhaan man sang blood samples ang mga baboy sa kaiping nga barangay sang Canapian nga amu ang barangay sang Aglimucon kag Quinabonglan.
Dugang pa ni Dizon nga wala na sang baboy nga nagaluko’ sa barangay nga narekord ang pinakauna nga kaso sang ASF sa probinsya kag talalupangdon nga malaka nalang ang nagahupot sang baboy sa amu nga barangay.
Mensahe sini sa mga barangay officials nga padayon sa pagmonitor sa sitwasyon sang mga baboy sa ila barangay kag gilayon i-report agud matagaan sang pagtamod.
Nahibaluan nga ginadudahan sa karon sang ila munisipyo nga ang ginbakal sang residente nga tig-P100 kada kilo nga karne sang baboy sa Sara, Iloilo ang posible infected sang ASF.
