Nagpaandam ang National Disaster Risk Reduction and Management Council (NDRRMC) sa publiko hanungod sa posible nga paglagbong sang mga debris nagikan sa Long March 7 rocket sang People’s Republic of China nga natalana nga ilunsyar sa Hulyo 15 tubtob17, 2025.
Igalunsyar ang rocket gikan sa Wenchang Space Launch Site sa Wenchang, Hainan, umpisa 0200H-0600H PhSt. Ginlauman nga ang mga parte sang rocket ang malagbong sa mga gintalana nga drop zones.
Naghatag sang paandam ang Philippine Space Agency sa publiko nga likawan ang pagkuha ukon pagpalapit sa mga materyales agud malikawan ang peligro nagikan sa mga nabilin nga makahililo nga substansiya kaangay sang rocket fuel.
Ginarekomendar ang paggamit sang Personal Protective Equipment (PPE) kun kinahanglan nga magpangusisa sa mga debris.
Ginaabisuhan man ang publiko nga gilayon ipahibalo sa mga lokal nga otoridad ang ano man nga debris nga makit-an sa dagat ukon kadutaan.
Ang Philippine Coast Guard (PCG), Bureau of Fisheries and Aquatic Resources (BFAR), kag Department of Environment and Natural Resources (DENR) NAMRIA ang ginaabisuhan nga magpatuman sang temporaryo nga paghigpit kag magpaguha sang Notice to Mariners, Coastal Navigational Warnings, ukon NAVAREA XI warnings kun kinahanglanon sa mga gintalana nga drop zones.
Ang mga Concerned RDRRMCs III kag MIMAROPA ginaabisuhan nga magpadayon sa pagbantay kag maghatag sang mga update angot sa sini nga hitabo.
