MANILA – Gindeklarar sang National Disaster Risk Reduction and Management Council (NDRRMC) ang Blue Alert status bilang preparasyon sa Mayo 12 sa National and Local elections.
Nagakahulugan ini nga naka-standby ang katunga sang mga disaster officials agud gilayon nga magresponder sa anuman nga emerhensya.
Ang Office of Civil Defense (OCD) nagpagwa sang memorandum nga nagatalana sang Blue Alert status halin alas 8 sang aga Mayo 09 tubtob alas 8 sang aga sa Mayo 14 agud masiguro ang nagakaigo nga koordinasyon sa tunga sang mga ahensya sa tion sang eleksyon.
Ang mga opisyales gikan sa Armed Forces of the Philippines (AFP), Bureau of Fire Protection (BFP), Philippine Coast Guard (PCG), kag Philippine National Police (PNP) ang magabantay sa NDRRMC Operations Center agud magsabat sa mga insidente kag pangabay sang mga regional disaster council.
Magluwas sini, ginamonitor man sang PNP ang mga lugar kun sa diin may narekord nga kalakasan may kaangtanan sa eleksyon.
Nagapanawagan ang OCD sa publiko nga magpabilin nga mabinantayon kag magkooperar sa mga otoridad agud masiguro ang malinong, safe, kag matawhay nga eleksyon.
