Ginsuguran na sang National Food Authority (NFA), ang pagpaguha sang two-month-old stocks sa mga Local Government Units (LGUs) sa idalum sang food security emergency sa bugas.
Suno kay NFA Administrator Larry Lacson, ang mga nauna nga LGU’s ang ginakalakipan sang San Juan, Valenzuela, Navotas, kag Camarines Sur.
Ang mga dugay na nga rice stocks ang igabaligya sa LGUS pinaagi sa Food Terminal Incorporated (FTI) sa P33.00 kada kilo.
Mahimo man ini nga ibaligya sang iban pa nga mga ahensya sang gobyerno kag government-owned and controlled corporations (GOCCs) sa mga consumer sa kada P35.00 kada kilo.
Ang pagpaguha sang NFA rice ang may tinutuyo nga makabulig nga mapanubo ang market prices pinaagi sa availability sang mas barato nga bugas subong man agud mapahatagan sang espasyo ang mga bodega sang NFA para sa pagbakal sang palay procurement nagikan sa local farmers.
Matandaan una na nga ginsiling sang Department of Agriculture (DA) nga target target sini makabaligya sang 150,000 metric tons (MT) sang NFA rice stocks sa sulod sang anum ka bulan.
Sa datos sang Philippine Statistics Authority, tubtob Enero, ang NFA depositories nagpagkit sang 284,810 MT rice stocks, mas mataas sang 485.1 percent kung ikumparar sa 48,680 MT rice stocks sadtong Enero 2024.
