ROXAS CITY – Ginpakigbahin sa Bombo Radyo sang isa ka Overseas Filipino Worker (OFW) ang iya naagyan matapos ginsikway sang iya employer kasunod sang pag-positibo sini sa coronavirus disease (COVID-19).
Sa interview sang Bombo Radyo, ginpahayag ni Jelli Elisha Boy, tumandok sang Barangay Casanayan, Pilar, Capiz kag nagatrabaho bilang domestic helper sa Abu Dhabi, nakabatyag siya sang kakulba sang una nga mag-positibo ang iya amo sa nasambit nga sakit.
Suno diri nga nabugtawan na lamang siya nga tuman ka sakit sang iya nga lawas, nagapangatol ang tutunlan, may ubo kag nabudlayan sa pagginhawa.
Sang nagpangayo ini sang bulig sa iya employer, wala sini ginalauman nga ginpanghimos ang iya nga gamit kag ginapalayas na ini.
Bangud sa pagkahangawa, ginpakamaayo sini nga magpabulong apang sa apat ka mga ospital nga iya ginpadulungan, apat ka beses man ini nga ginbalibaran.
Wala na ini sang madumduman pa nga pamaagi kundi ang magpakuno-kuno nga himamatyon sa pila ka mga Filipino doctors.
Indi man malimtan ni Jellie ang tubtob maaga sini nga paghinibi sa guwa sang ospital bitbit ang iya mga kagamitan tubtob sa ginhambalan na ini nga isa siya sa mga magapaidalom sa 14-day quarantine sa Al Ain University nga nagaserbi nga isolation area sa pungsod.
Indi man suno diri nangin mahapos ang iya naagyan sa sulod sang isolation area ilabi pa nga adlaw-adlaw may nagakapatay diri.
Ang pagpakig-away suno diri sa COVID-19 ang ginakabig nga away sa physical, mental, phsychological kag spritiual.
Adlaw-adlaw suno diri, nagapamati siya sang mga worship songs kag ginalingaw ang iya kaugalingon sa pag-Tiktok kag zumba nga nagaserbi sini nga ehersisyo.
Tuman man ang pagpasalamat ni Jelli sang mag-negatibo na ini sa nasambit nga virus sa ika-13 sang iya nga quarantine.
Nagapati ini nga pangamuyo kag pagsalig sa Diyos ang isa sa iya nangin armas agud malampuwasan ang tanan sini nga naagyan kag maka-rekober sa amo nga sakit.
