ROXAS CITY – Gin-limitahan sang mga opisyales sang Barangay Punta Tabuc, Roxas City ang mga nagasulod nga mga indibidwal sa ila nga lugar.
Ini ang ginpahayag ni Punong Barangay Nestor Buenviaje sang mainterview sang Bombo Radyo.
Kasunod ini sang pag-positibo sa coronavirus disease (COVID-19) sang isa ka residente sang amo nga barangay.
Ini amo ang 25-anyos nga lalaki nga isa ka admin staff sang isa ka mall sa Barangay Lawaan, sining siyudad.
Wala ini sang travel history sa mga lugar nga infected sa virus kag wala man sang exposure sa suspect ukon confirmed case nga mga indibidwal sa COVID-19.
Ginapahayag nga wala man ini nakakadto sa high risk area sa siyudad.
Nagpa check-up ini sa ospital matapos nakabatyag sang chronic allergic cough, hilanat kag makatol nga tutunlan.
Sa karon, nagapabilin ini nga ginabulong sa Roxas Memorial Provincial Hospital ukon RMPH.
Suno kay Buenviaje nga kapin tatlo ka mga balay ang ila gin-kordonan kag ginpaidalom sa strict home quarantine ang mga naka-close-contact sang amo nga pasyente.
May yara man suno diri sang naka-isolate sa ila nga barangay quarantine facility.
Ginlimitahan naman sa mga residente ang mga nagasulod nga persona sa ila barangay ilabi na kun wala man sang importante nga transaksiyon.
