ROXAS CITY – Gin-aprubahan na sang Sangguniang Panlalawigan ang supplemental budget nga request sang talatapan sang gobernador sang probinsiya gikan sa savings sang gobyerno-probinsiyal.
Ini ang ginpahayag ni Board Member Jonathan Sonny Besa sang mainterview sang Bombo Radyo.
Mahibaluan nga ang nasambit nga budget ang nagabalor sang kapin 27 milyones pesos.
Ang amo nga pondo ang pagagamiton para sa operasyon, equipments kag mga pasilidad sa Roxas Memorial Provincial Hospital.
Diri man pagakuhaon ang pondo para sa operasyon sang dialysis center sa amo nga ospital.
Gindugang pa ni Besa nga sa nasambit nga pondo man kuhaon ang pagbakal sang bulong para sa dialysis center sang RMPH.
Diri man pagakuhaon ang pondo nga gamiton para sa pagpadayon sang scholarship program sang gobyerno-probinsiyal.
Apang ginalauman nga madugangan pa ang pondo para sa scholarship program sang gobyerno-probinsiyal antes magtakop ang tuig 2019.
Ginapahayag nga kapin 5 milyones pesos pa ang igadugang nga pondo para sa amo nga programa apang wala pa mahitsu kun sa diin ini pagakuhaon.
Mahibaluan nga plano sang gobyerno-probinsiyal nga magpain sang kapin 14 milyones pesos nga pondo para sa pagpadayon sang scholarship program.
Samtang, gin-aprubahan man ang 14 milyones pesos nga pondo para sa Performance-Based Bonus (PBB) para sa mga regular nga empleyado sang gobyerno-probinsiyal.
Mahibaluan nga katunga sang kabilugan nga sweldo sa isa ka bulan ang mabaton sang regular nga empleyado bilang PBB.
