MANILA, Philippines – Aprubado na sang National Wages and Productivity Commission (NWPC), ang P45 nga pagsaka sa adlaw-adlaw nga sweldo sang minimum wage earners kag P1,000 nga dugang sa binulan nga sweldo sang mga kasambahay sa Bicol Region.
Ang pagsaka gin-aprubahan sang “Regional Tripartite Wage and Productivity Board Region V”, paagi sa Wage Order No. V-23 nga magaepekto sa Abril 8 kag ipatuman sa duha ka bahin.
Sa una nga tranche nga P20 ihatag sa Abril 8, samtang ang nabilin nga P25 ihatag sa Disyembre 1, 2026, nga magadala sang minimum nga adlaw-adlaw nga sweldo halin P435 pakadto sa P480.
Lakip sang wage hike ang mga pribado nga empleyado sa mga syudad sang Iriga, Legazpi, Ligao, Masbate, Naga, Sorsogon, kag Tabaco, kag ang tagsa ka mga probinsya sang Albay, Camarines Norte, Camarines Sur, Catanduanes, Masbate kag Sorsogon.
Samtang, ang mga kabulig sa balay sa rehiyon makabaton man sang P1,000 nga dugang sa binulan nga suweldo epektibo sa Abril 5, nga magapataas sang minimum nga sweldo halin P5,000 tubtob P6,000.
