CAPIZ– Naglab-ot nagapakita nga P675,180,000 ang gin-aprubahan nga pondo para sa social pension sang mga senior citizen sa probinsya sang Capiz para sa isa ka tuig.
Base sa datos sang Department of Social Welfare and Development (DSWD), ini nga pondo igahatag sa 56,265 ka mga kwalipikado nga benepesyaryo nga nagikan syudad sang Roxas sa 16 ka banwa sa Capiz nga ginakalakipan sang Maayon, Panay, Panitan, Pilar, Pontevedra, President Roxas, Cuartero, Dao, Dumalag, Dumarao, Ivisan, Jamindan, Mambusao, Sapian, Sigma, kag Tapaz.
Sa interview sang Bombo Radyo kay Holibeve Noserale, Project Development Officer sang Social Pension sa DSWD Region 6, iya ginpahayag nga may mga Social Welfare Assistants sa kada munisipyo nga gabulig sa pag-validate kag pag-endorso sang mga benepesyaryo.
Suno kay Noserale ang kada senior citizen nga kwalipikado sa social pension program makabaton sang P1,000 kada bulan, kag ginatingub ini nga gina-release kada tatlo ka bulan, rason nga P3,000 ang total kada payout.
Ginpahayag sang DSWD nga ang mga benepesyaryo sini amo ang mga senior citizens nga wala sang ginabaton nga pension gikan sa GSIS, SSS, ukon bisan ano nga private retirement fund kag wala sang regular nga palangabuhian.
Dugang pa sang natungdan nga ginauna man sang DSWD ang mga Persons with Disabilities (PWDs) sa listahan sang mga prioridad nga benepesyaryo, ilabi na kon wala sila sang source of income.
Ang programa sang AICS (Assistance to Individuals in Crisis Situations) padayon nga naga-cater sang bulig pareho sang medical assistance, burial assistance, educational assistance, transportation assistance, food assistance, kag cash relief.
Base sa datos sang DSWD Capiz, may 36,373 ka mga benepisyaryo ang naka-avail sang AICS tubtob Hunyo 2025. Samtang, may 28,709 ka mga panimalay ang sakop sang Pantawid Pamilyang Pilipino Program (4Ps), kag 172 ka asosasyon naman ang naga-partisipar sa Sustainable Livelihood Program (SLP).
Ginapanawagan man ni Noserale sa mga benepesyaryo ukon pamilya nga may pamangkot ukon reklamo nga magpadala lamang sang mensahe sa opisyal Facebook page sang DSWD Western Visayas para sa legal kag eksakto nga impormasyon.
