ROXAS CITY – Gin-aprubahan na sang Sangguniang Panlalawigan ang request ni Capiz Governor Esteban Evan Nonoy Contreras nga P7.5 million nga supplemental budget para sa gratuity pay sang mga JO’s kag casual employee sang gobyerno probinsyal.
Ini natigayon sa pinakauna nga session nga ginpatigayon sang Sangguniang Panlalawigan kahapon Enero 5, 2020.
Mahibaluan nga antes ini gin-aprubahan gintalakay anay sang mga board member ang ginarequest nga pondo kag numero sang mga empleyado nga makabaton sang P3,000.
Sa nasambit nga session ginpatawag si provincial budget officer Antonio Arbis kag provincial accountant Atty. Ernie Arcenas may kaangtanan sa ginarequest nga pondo sang gobernador.
Magluwas diri, ginpamangkot man ni Board Member Jonathan Sonny Besa kun pila ang numero sang mga empleyado sang gobyerno probinsyal nga makabaton sang gratuity pay.
Ginapahayag nga nagalab-ot sa masobra 2,300 ka mga empleyado ang natalana nga hatagan sang nasambit nga inisyatibo.
Apang ginapangayuan pa sang Sangguniang Panlalawigan si Human Resource Management Office head Francisco Dariagan sang listahan sang mga pangalan kag kun sa diin nga departamento nagatrabaho ang mga JO’s kag casual employees sang probinsya tubtob sa Enero 15, 2020.
Matandaan nga wala nadayon ang pagpanagtag sa mga empleyado bangud wala nakapatigayon sang quorum ang mga board members sadtong Disyembre 29 sang nakaligad nga tuig 2020.
Samtang, natalana naman nga talakayon sa masunod nga session sang Sangguniang Panlalawigan ang pag-veto ni Contreras sa ginpapasar nga appropriation ordinance sang mga board members.
Mangin kaupod sa nasambit nga session ang Legal Office, Provincial Administrators, IBP-Capiz Chapter, kag DILG agud mabal-an kag klaru sa mga board members ang rason sa pag-veto sang gobernador.
