ROXAS CITY – Ginalauman na sang Philippine Army sa pagpamuno ni Lt. Col. Sisenando Magbalot Jr., battalion commander sang 61st IB ang paghingalit sang mga terorista nga New Peoples Army sa sitwasyon karon sa Western Visayas labi na nga ginpadala sa Marawi City ang iban nga mga soldado para magpakig-away sa maute terror group.
Suno kay Lt. Col. Magbalot Jr., nga preparado ang Philippine Army sa koordinasyon sa Philippine National Police nga maghatag sang seguridad sa publiko.
Pamatood diri ang pagpatigayon sang combat operation sang militar sa pila ka mga lugar nga ba-se sa impormasyo nga nabaton, masami nga makita ang presensiya sang grupo.
Samtang, planado nga terroristic act ang ginhimo sang mga NPA sa mga miyembro sang Guihulngan Police Station, sa diin anum ang napatay kalakip ang hepe sang ila nga istasyon.
Ginpahayag ni Magbalot nga ginahimo nga pa-on sang NPA ang pag-atake sa isa ka tawo kag sa pagresponde sang mga pulis makaangkon ini sang tion nga i-ambush ang mga alagad sang kasuguan.
Bangud diri, ginpahanumdum ni Magbalot ang mga soldado nga indi gilayon magreact sa mabaton nga impormasyon sa baylo i-validate ini bangud posible nga isa lamang ini sa mga drama sang NPA.
