ROXAS CITY – Nagpasalamat si Mayor-elect Joemarie Openiano sa mga Cuarterohon nga nagsuporta kag nagsalig sa iya nga mangin masunod nga alkalde sa banwa sang Cuartero.
Sa pagpakig-angut sang Bombo Radyo kay Openiano, ginsiling sini nga gin-ekspektar na niya ang amu nga kadalag-an, bangud sa iya paglibot sa tion sang kampanya, mabatyagan sini ang hinyo sang mga residente nga pagbag-o sa ila banwa.
Sa iya mangin liderato, ginpahayag ni Openiano nga madamo ini sang plano sa ila banwa kag nakalinyada na ang iya paga-unahon nga mga proyekto.
Una diri, amu ang imprastraktura, kun sa diin, iya pagapadayunon ang pagpasemento sa mga karsada ilabi na ang farm to market road, kaangay sa mga Barangay sang San Antonio, Putian kag Mahunod-hunod.
Subong man ang pag-imprubar sang dalan sa mga nabukid nga bahin sang Cuartero, ilabi na sa Barangay sang Mainit kag Agdahon, agud mabuligan ang mga mangunguma sang mais kag iban pa.
Nakalinyada man ang pagpahimo sang two-storey nga edipisyo sa tunga nga bahin sang merkado publiko.
Aminado si Openiano nga limitado lamang ang pondo sang ila munisipyo, gani pagatinguhaan sini nga makapangayo sang bulig sa gobyerno-probinsyal sa tion nga makapungko si Governor-elect Cong. Fredenil ‘Oto’ Castro nga iya kapartido.
Indi man lipod kay Openiano nga nakabati ini sang pila ka istorya nga mabudlayan ini nga malutos ang iya kasumpong nga si Vice Mayor Roger Flores, apang posible bangud sa iya tinutuyo nga progreso sa Cuartero, nabatyagan ini sang mga pumuluyo, rason sang iya kadalag-an.
Nahibaluan nga may yara sang abanse nga 837 nga boto si Openiano batuk kay Flores sa posisyon sang pagka-alkalde.
