Pagbaligya sang panginhason sa TATC ginadumilian tubtob wala pa nagguwa ang resulta sang shellfish meat sample

ROXAS CITY – Hugot nga ginadumilian sang City Agriculture Office ang pagbaligya sang panginhason sa Teodoro Arcenas Trade Center (TATC) tubtob wala pa nagguwa ang resulta sang shellfish meat sample nga ginpadala sa central office sang Bureau of Fisheries and Aquatic Resources (BFAR).

Sa interview sang Bombo Radyo kay City Agriculturist Mary Ann Baria, ginsiling sini nga ginahulat sang ila talapatan ang resulta sang sample agud mahibaluan ang nagakaigo nga tikang agud maresolba ang problema nga ginapangatubang sang probinsya.

Suno diri, magapatigayon sila sang inspection sa TATC, matapos nga nakalab-ot sa ila nga may yara man sa gihapon sang nagabaligya sang panginhason apisar may ginpaguwa na nga abiso nga pagsuspendi.

Pahayag ni Baria, naintindihan man sini ang mga nagabaligya bangud amu lamang ini ang ila pangabuhian apang indi man sini luyag mabutang sa peligro ang kabuhi sang kadam-an.

Sa tion nga mag-insister ang manugbaligya nga magbaligya sang panginhason kinahanglan sini magpresentar sang certification kun sa diin nagikan ang ginabaligya nga produkto.
Magluwas sa pagbaligya sang panginhason, ginadumilian man sa gihapon ang pagharvest ilabi na sa mga apektado nga lugar diri sa syudad sang Roxas.

Hugot naman nga ginamonitor ang mga coastal areas pananglitan may mga residente nga wala magtuman sa ginpapanaug nga abiso.

Natalana naman nga magapatigayon sa Huwebes sang water sample test agud mahibaluan kun tubtob sa diin na ang naapektuhan sang red tide.