ROXAS CITY – Wala sang kaangtanan sa drug cases nga ginfile sa Muntinlupa Regional Trial Court ang pagbasura sang Ombudsman sa bribery case batuk kay former Senator Leila de Lima bangud sa kakulangan sang ebidensya.
Ini ang ginpahayag ni Atty. Nelson Borja, isa ka Capiznon criminal lawyer sang mainterview sang Bombo Radyo.
Ginklaro sini nga ang pagbasura sang bribery case kag pagretract ukon pagbawi sang nangin pahayag ni Kherwin Espiñosa kag former officer-in-charge sang Bureau of Corrections (BuCor) Rafael Ragos, nga nagtindug bilang witnesses batuk kay de Lima ang wala sang epekto kag imposible nga mangin rason agud makaguwa sa karsel.
Apang, suno diri mahimo nga makafile ang grupo ni de Lima sang Motion for Bail kag nakadepende pa ini kun ganu kabaskog ang ginahawiran nga ebidensya batuk sa akusado antes tugutan sang korte.
Ginkwestyon man sini ang timing sang pagbawi sang statement sang duha ka testigo bangud pila na katuig ang nanligad sang ginkasuhan si de Lima may kaangtan sa illegal drug trade kag subong lamang nagpangisog nga bawion ang testimonya pinaagi sa media.
Ginpunto man ni Atty. Borja nga wala sang epekto ang media pronouncement sang duha bangud mangin basehan man sa gihapon sa korte ang mga ginrepresentar nga mga ebidensya sa tion sang trial.
