ROXAS CITY – Ginkompirmar sang pamunuan sang Capiz Provincial Health Office nga mas madasig na sa karon ang pagpaguwa sang resulta sang real-time polymerase chain reaction (RT-PCT) test sang Western Visayas Medical Center (WVMC) sa siyudad sang Iloilo.
Ini ang ginpahayag ni Acting Provincial Health Officer Dr. Leah Del Rosario sang mainterview sang Bombo Radyo.
Suno kay Del Rosario, mas madasig karon ang pagpaguwa sang laboratory results sa Western Visayas bangud may yara na sang ginagamit nga fully-automated machine para sa mga swab specimen.
May yara man suno diri sang Memorandum of Agreement (MOA) sa tunga sang government kag private laboratories rason nga nagabuligay ini agud mapadasig ang pagpaguwa sang resulta sang swab tests.
Ginpahayag sini nga tagsa ka Lunes, Miyerkules kag Biyernes ang schedule sang Capiz PHO sa pagdul-ong sang swab specimen sa Iloilo.
Apang kun emergency cases suno diri kapareho sang mga indibidwal nga may severe symptoms, gilayon nga gindul-ong ang swab specimen sang mga ini sa testing laboratory.
Liwat nga ginpanindugan ni Del Rosario nga tuman ka importante ang pagpaidalom sa quarantine period samtang nagahulat pa ang isa ka persona sang iya nga swab results.
