ROXAS CITY -Ginapanindugan sang Chairman sang Committee on Public Utilities sang Sangguniang Panlungsod nga wala sa hurisdiksyon sang gobyerno sang syudad ang magpahalin sa Buyo Transport Services nga ginareklamo sang grupo sang mga legal nga operators kag drivers sang D-1st Capiz Transport Services Cooperative nga nagaterminal sa Roxas Integrated Transport Terminal sa Pueblo de Panay, sa Barangay Lawaan, sining syudad.
Ginpahayag ni City Councilor Albert Gregory Potato nga wala sang otoridad ang city council nga magpanguna sa pagpahalin sa ginareklamo nga transport van services bangud wala ini sang nalapas nga anuman nga ordinansa sa syudad.
Suno sa opisyal sa kasubong nga reklamo sang D 1st Transport Services batuk sa Buyo Transport nga nagapasakay sang pasahero sa pihak nga tourist transport vehicle ini ang may hurisdiskyon nga magdakup sa ila amo ang Land Transportation Office (LTO) ukon deputized nga High way patrol group.
Indi man mahimo nga mabawalan ang Buyo Transport Services nga magsulod sa terminal labi na nga may ticketing office sila kag wala sang ginalapas nga ordinansa sang syudad.
Gindugang pa ni Potato nga may pending case pa sa karon sa Land Transportation Franchising and Regulatory Board (LTFRB) ang Buyo Transport Services kag pananglitan nga mapamatud-an sang ahensiya nga naglapas ini, mahimo nga kanselahon ang ila nga frankisa.
