ROXAS CITY – Aminado ang pila ka mga manunudlo sa Don Francisco Dinglasan Memorial School sa Barangay Punta Tabuc sining siyudad nga tubtob subong nga adlaw nagid lamang ang ila pagpanagtag sang module para sa ila mga estudyante nga nagpa-enroll sa nasambit nga buluthuan.
Ini ang ginpahayag ni Elvern Deluso, manunudlo sang mainterview sang Bombo Radyo.
Suno kay Deluso nga una nila ginhatagan sang modules ang mga ginikanan sang ila mga estudyante humalin sa kindergarten tubtob sa Grade 3 pupil.
Ini agud nga indi mag dinaguso ang mga ginikanan sa pagkuha sa nasambit nga buluthuan sang mga learning modules rason nga ginpaulihi nila hatagan ang mga estudyante humalin sa Grade 4 tubtob Grade 6.
Ginpahayag ni Deluso nga pinasahi subong ang sitwasyon sang pagtulun-an kun ikumparar sadto nga wala pa sang COVID-19 Pandemic.
Dugang pa sini nga mabudlay man sa ila bahin nga mga manunudlo ang bag-o nga pagtulun-an subong rason nga nagapanawagan gid ini sang bulig sa mga ginikanan nga indi pagpabay-an ang ila mga kabataan.
Magluwas diri, padayon sa gihapon ang pag-ubra sang modules para sa mga estudyante kabangdanan man nga ginakulang na sila sang bond paper subongman phocopier ukon Xerox machines kag printer.
Gin-athag man sini nga base sa ila nga modules may yara sang preliminary activity sa una nga semana ang mga kabataan antes pagasabtan ang ila modules nga igapasa man gilayon matapos ang duha ka semana.
Nagpahibalo man ini nga kutob sa Nobyembre 25 ang enrollment period para sa mga estudyante.
