ROXAS CITY – Ginpasiguro sang provincial administrator kag chairman sang Bids and Awards Committee (BAC) nga wala ginatolerar sang Contreras administration ang ginaalegar pagpangilkil sang katapu sang Technical Working Group (TWG) sa mga contractor kag supplier.
Ini ang matigdas nga panugdaon ni Dr. Edwin Monares kasunod sang naglapta nga report nga isa ka TWG member ang ginaalegar nagademanda sang tres porsyento sa tagsa ka proyekto sa mga contractor kag supplier.
Suno kay Monares nga gintawag na sini ang atensyon sang nasambit nga indibidwal kag gin-imporma angut sa nakalab-ot sa ila nga report nga pagpangayo sang tres porsyento sa kada proyekto nga matigayon.
Ginpahayag sang opisyal nga klaro ang mandu ni Governor Contreras nga wala sang pakasin-uhon sa mapamatud-an nagahimo sang iregularidad sa transaksyon.
Ginpasiguro man sini nga pananglitan mapamatud-an nga nagapangilkil ang amo nga persona, posible nga mapahalin ini sa pwesto.
