ROXAS CITY – Posible sa bulan pa sang Oktubre igapatuman ang pagpataas sang plete sa mga Public Utility Jeepney (PUJ) sa syudad sang Roxas partikular sa bahin sang Pueblo Terminal.
Ini ang ginpahayag ni Mr. Benjie Nallos, Jeepney driver sang mapakig-angutan sang Bombo Radyo.
Matandaan gin-aprubahan na sang LTFRB ang P1 nga saka sa plete sa mga tradional kag modernized jeepney.
Suno kay Nallos, gamay lang ang mangin epekto sini sa ila bangud wala masyado sang pasahero sa Pueblo terminal, dugang pa nga tuman ang pagtaas sa presyo sang diesel samtang gamay naman ang rollback.
Dugang pa sini nga P11 ang sa karon nga taripa sa mga traditional jeepneys apang masami P10 lang ang ginabayad sang mga pasahero gani piyerde gid sila.
Mahibaluan ba-se sa LTFRB, P11 ang plete sa mga traditional PUJ’s samtang P13 naman sa modern PUJ’s sa kada 1st 4 kilometers nga biyahe.
