ROXAS CITY – Ginpasiguro ni Presidential Communications Operations Office (PCOO) Undersecretary Joel Egco nga magapatigayon sang madalom nga imbestigasyon ang Presidential Task Force on Media Security (PTFoMS) sa natabo nga pagpatay sa isa ka radio broadcaster sa Dumaguete City nga si Dindo Generoso.
Sa interview sang Bombo Radyo Roxas kay Egco nga amo man ang executive director sang PTFoMS, ginpahayag sini nga kinahanglan mabal-an kun ano ang motibo sang mga suspek sa pagpatay kay Generoso.
Suno kay Egco ginalantaw sang task force kun may mga nabungguan nga dalagkuan nga mga personalidad si Generoso bangud sa trabaho sini bilang radio blocktimer sang city government.
Ginalantaw man nila ang anggulo nga mahimo personal ang motibo sa pagpatay kay Generoso bangud madamo man sang nangin abyan nga mga pulitiko sadto ang biktima.
Ginpasiguro man ni Egco nga ginaimbestigahan sang task force ang tanan nga mga kaso sang kalakasan batuk sa mga katapo sang media.
