ROXAS CITY – (Update) May penalidad sa idalom sang Republic Act No. 8485 ukon “Animal Welfare Act of 1998” nga pagaatubangon ang Barangay Kagawad nga nagpatay sang ido, sa Barangay Lus-onan, banwa sang Panay.
Ini ang ginpahayag ni Atty. Albert Gregory ‘Gary’ Potato, City Councilor, sang mainterview sang Bombo Radyo.
Suno sa abogado, kun basehan ang pahayag sang Brgy. Kagawad sa rason sini sa pagpatay sa ido nga si “Princess” kun sa diin ginlampusan sini sang karik bangud ginaalegar ginlagas sang ido ang iya manok, ang indi ‘justifiable’ agud patyon ang amu nga sapat.
Nakadepende man suno diri sa Korte nga posible indi pag-ipataw ang maximum nga penalidad, apang, may yara gid sang penalidad sa pagpatay sa ido, bangud iban ang lebel sang ido ikumparar sa manok.
Makumparar ini sa kaso sang tawo nga matawag indi justifiable kaangay kun ginsumbag lang ang suspek, apang ginpatay gid sini ang biktima.
Ginpahayag man sini nga ang tagsa-tagsa ka sapat ang may yara sang kinamatarong sa idalom sini nga layi, may mga sapat nga gintalana nga patyon agud makaon sang tawo kag may mga sapat nga bawal patyon ukon sakiton kag isa na diri ang ido – may breed man ukon wala.
Apang, kinahanglan man nga ang mga tag-iya sang sapat kaangay sang ido ang magsunod sa layi kag atipanon sang insakto ang ila kasapatan.
Bangud sini, nakadepende sa tag-iya sang ido kun magapasaka ini sang kaso batuk sa Kagawad, bangud protektado sang layi ang kasapatan sa Pilipinas.
