ROXAS CITY -Pagatutukan sang pamunuan sang City Engineers Office ang pagresolbar sang pagduging sang mga basura sa kasubaan nga sakup sang siyudad sang Roxas.
Ini ang ginpasalig ni City Engineer Noel Laminares sang mainterview sang Bombo Radyo Roxas.
Ginpahayag ni Laminares nga plano sang siyudad nga i-relocate ang mga illegal settlers nga naga-istar sa kilid sang suba nga amo ang may yara sang dako kontribusyon sa paghaboy sang basura sa suba.
Suno kay Laminares nga kapin sa 108 ka mga panimalay nga naga-istar sa kilid sang Bangbang creek sa Barangay Inzo Arnaldo Village sining siyudad ang ginhatagan sang notisiya agud magpreparar para sa natalana nga relokasyon.
Magluwas diri, magatutuk man ang City Engineers sa pag-declog kag paglimpyo sang mga drainage system sa siyudad.
Suno kay Laminares nga madamo sang basura sa mga kasubaan ang gikan sa mga drainage sa siyudad.
Gin-ako man sini nga ang ginaguhaan sang tubig nga nagikan sa mga drainage system sang siyudad ang nagakadto sa Panay River.
Nagapati si Laminares nga sa tion nga ma clear ang mga ilegal settlers nga nagaistar sa kilid sang suba kag pag-declog sa mga drainage system ang isa sa mga pamaagi agud maresolbar ang pagduging sang mga basura sa mga kasubaan sa siyudad.
