Ginsiling ni Speaker Ferdinand Martin Romualdez, nga kinamatarong ni Vice President Sara Duterte nga magdesisyon kun magatambong siya ukon indi sa ika-tatlo nga State of the Nation Address (SONA) ni Pangulong Ferdinand Bongbong Marcos Jr., sa Hulyo 22, 2024.
Suno kay Romualdez, indi sang pilitay ang pagtambong sa SONA ni Duterte.
Ini ang iya nga nangin reaksyon matapos ginsiling sang bise-presidente nga indi siya magatambong sa nasambit nga adlaw.
Apang, ginpahanumdum man ni Romualdez nga ang SONA indi lamang isa ka simple nga event kundi isa ini ka importante nga tion agud magbinuligay kag mangin isa ang mga lider sang pungsod.
Ginsiguro man sini nga sa pihak sang indi pagtambong ni Duterte, padayon sa gihapon nga makig-angut ang Kamara sa nagkalain-lain nga sangay sang gobyerno agud mapa-umwad ang kabuhi sang mga Pilipino.
