Back to back win para sa Pilipinas ang kadalag-an ni Emma Tiglao sa Miss Grand International 2025 nga ginhiwat sa Bangkok, Thailand.
Si Emma ang ginkoronahan sang outgoing Miss Grand International 2024 CJ Opiaza, halin man sa Pilipinas.
Pagkatapos nga ginkoronahan si Emma, gintukar ang pungsudnon nga ambahanon sang Pilipinas sa lugar, kag ginsundan ini sang iya una nga paglakat bilang Miss Grand International 2025.
Antes sini, sa Top 10 speech ni Emma, nagpahayag ini batuk sa korapsyon sa Pilipinas kag iban pa nga importante nga isyu.
Sa evening gown competition, si Emma gindayaw sang mga tumalan-aw bangud sa iya suksok nga orange gown nga may nagakaigo nga feather cape nga gindesinyo ni Rhian Fernandez.
Samtang, nagdaug man bilang 4th runner up ang Venezuela, 3rd runner up naman ang Ghana; 2nd runner up ang Spain; kag 1st runner up naman amo ang Thailand.
