Pila na lamang ka adlaw kag matapos na kuntani ang employment contract sang 28-anyos nga Filipino seafarer nga si Rodrigo Rod Favis sang napatay ini sa Strait of Hormuz.
Subong nagapangayo sang sabat ang iya pamilya sa natabo.
Si Rod ang isa sa duha ka Filipino seafarers nga napatay samtang sakay sang SIDR, isa ka Saudi Arabian oil tanker nga nagatabok sa Strait of Hormuz, ang importante nga dalan sa dagat nga yara sa sentro sang armado nga tensyon sa tunga sang Estados Unidos kag Iran.
Ang ila barko ang naigo sang wala pa mahibaloan nga mga projectile.
Suno sa iya utod nga si Ryan Favis, indi kabahin sang kontrata ni Rod ang pagbiyahe pakadto sa Strait of Hormuz.
Nahibaluan lamang ini ni Rod sang yara na siya sakay sang barko matapos siya ginsugiran sang iya mga kaupdanan.
Suno pa sa pamilya, ang orihinal nga ruta sang barko yara lamang sa Europe kag wala nagalakip sa Strait of Hormuz.
Pila lamang ka oras antes sang insidente, nakasugid pa si Rod sa iya pamilya nga padulong sila sa Strait of Hormuz.
Suno kay Ryan, nagsiling si Rod nga papasulod na sila sa Strait of Hormuz.
Ginpahayag man niya nga daw ginapakalma lamang ni Rod ang iya kaugalingon bangud indi gid sini luyag kuntani nga magpadulong sa nasambit nga lugar.
Ginkasubo ni Ryan ang ginhimo nga sabat sang Jebsen PTC matapos ang insidente.
Suno sa iya, nagkadto ang mga tiglawas sang ahensya sa ila balay kag ginpangabay sila nga magpirma sang letter of acceptance kag magdesisyon kun ilubong ukon ipa-cremate ang bangkay ni Rod.
Apang suno kay Ryan, wala pa sila nakabaton sang maathag kag verified information tuhoy sa bangkay.
Wala pa man sila ginhatagan sang kasiguruhan kun 100% nga bangkay gid ni Rod ang narekober, lakip na ang impormasyon tuhoy sa DNA kag pisikal nga kahimtangan sini.
Bangud sini, nagapangayo ang pamilya Favis sang imbestigasyon sa natabo kag ginpahayag ni Ryan nga handa sila magpasaka sang kaso kun kinahanglan.
Gin-deploy si Rod sang Agosto 6 kag isa lamang ka bulan ang iya employment contract.
Ginalauman na niya ang iya pagpauli, ilabi na bangud nagabusong ang iya live-in partner sa ila una nga bata.
Tatlo ka adlaw antes sang kamatayon, nahibaluan ni Rod nga mangin amay na siya.
Suno kay Ryan, daku ang kalipay ni Rod sa pagkahibalo sini kag mas nangin handum niya ang makapauli kuntani.
