ROXAS CITY – Padayon nga nagasinggitan sang hustisya kag nagtan-ay na sang P50,000 ang pamilya sang isa ka iloy nga ginpatay kag gina-alegar ginhimuslan sa Sitio Barosbos, Barangay Lonoy, Sapian, Capiz sa kun sin-o man ang makatestigo ukon makatudlo sa may kahimuan sang nasambit nga krimen.
Sa interview sang Bombo Radyo kay Rogie Alcatura bana sang biktima, ginpahayag sini nga wala sa gihapon nagahulag tubtob sa karun ang kaso angut sa pagpatay sang wala matumod nga suspetsado sa iya asawa.Dugang pa sini, nga ginsilingan sila sang Sapian Municipal Police Station nga magpangita sang testigo nga makatudlo sa suspetsado agud mahatagan sang hustisya ang kamatayon sang biktima.
Wala pa suno diri naka-abot ang resulta gikan sa imbestigasyon sang Scene of Crime Operations (SOCO) kag wala pa nakumpirmar kun ginlugos antes ginpatay ang iya asawa.
Suno kay Alcatura, nag-amutay ang ila pamilya sang kwarta agud makatipon sang P50,000 nga ila igahatag bilang reward sa magatestigo.
Matandaan, ginkilala ang biktima kay Rosalie Barried nga nasapwan patay kag may las-las sa liog, samad sa nawong kag iban pa nga parte sang kalawasan samtang wala na sang may ginasuksok nga pang-idalum nga panapton.
Nagalaom naman ang pamilya nga mahatagan gid sang hustisya ang kamatayon sang ila himata.
