Ginkadismaya sang Public Attorney’s Office ang nangin desisyon sang Department of Justice nga i-atras ang kaso nga una na nga gin-file batuk kay anay Health Secretary Janette Garin kag iban pa nga indibidwal nga naulamid sa isyu sang Dengvaxia vaccine.
Bangud sini, nag-file sang motion for reconsideration ang PAO kag ginhinyo nga bawion sang Justice Department ang ila nga desisyon.
Sandig sa 68 ka panid sang motion for reconsideration, ginpahayag sang PAO nga may ara sang bastante nga prima facie evidence agud pamatud-an nga guilty si Garin, Dr. Gerardo Bayugo, kag Dr. Ma Joyce Ducusin.
Pamatuod na suno diri ang pagkapatay sang 170 nga kabataan matapos nga maturukan sang Dengvaxia vaccine.
Ginpahayag man sa mosyon nga indi mahimo nga palagyuhan sang mga akusado ang ila nga salabton sa layi.
Dugang pa nga napamatuad man nga ang mga akusado ang naka-commit sang gross negligence, absence of foresight, care and skill.
Punto pa sang PAO nga nangin experimental lamang ang pagturok sang Dengvaxia vaccine.
