Nagdangat na sa 18 ka indibidwal ang napatay kalakip ang 12 ka bata samtang anom nga iban pa ang missing sa nagluntad nga lanslide sa Talisay, Batangas.
Suno kay Patrolwoman Nenette Landicho sang Talisay Police Station, nga ila narekober ang bangkay sang mga biktima sa lugar sang landslide sa Purok B sang Barangay Sampaloc.
Natabo ang landslide bangud gab-i sang Huwebes bangud sa wala untat ang pagbubu sang makusog nga ulan.
Ginpahayag naman ni Batangas police director Col. Jacinto Malinao nga posible nga magtaas pa ang numero sang mga napatay bangud sa may pang anom ka indibidwal pa ang padayon nila nga ginapangita kalakip ang isa ka babayi kag puya sini nga natabunan sang madakmol nga duta.
Ginsiguro naman ni Talisay Mayor Nestor Natanaua nga ila pagabuligan ang mga pamilya sang biktima.
Sa karon, yara na sa 311 pamilya nga ginakabug-usan sang 1,457 ka indibidwal ang yara sa evacuation centers.
Una na nga ginpahamtang ang probinsiya sang Batangas sa State of Calamity bangud sa matindi nga halit tuga sang bagyong Kristine.
