ROXAS CITY – Gin-isa-isa nga ginsabat ni Punong Barangay Melchor Ubal sang Barangay Vizcaya, President Roxas, ang reklamo sang mag-asawa may kaangtanan sa ginapahayag nga pagpang-utod sini sa ila mga tanum nga saging sang damlag lang.
Sa interview sang Bombo Radyo kay Ubal, ginpahayag sini nga nagasunod lamang sila sa mga tikang nga ginapatuman sang gobyerno kung sa diin magpatigayon sang Kalinisan for Clearing sa tanan nga lugar sa pungsod.
Matandaan nga personal nga nagpadulong sa talatapan sang Bombo Radyo Roxas ang mag-asawa nga sanday tatay Danilo kag nanay Lydia Denaga, agud i-reklamo si PB Ubal angut sa ginapahayag nga pagpatapas sang ila mga tanum nga saging nga wala sila ginpahibalo.
Suno sa Punong Barangay, wala sang kamatuoran nga wala makahibalo si Lydia Denaga nga magapatigayon ang ila barangay sang clearing operation sa higad sang dalan bangud volunteer ini sa ila barangay.
https://www.facebook.com/photo/?fbid=927684019393518&set=a.471108228384435
Sa pagkamatuod pa suno diri nga siya mismo ang nagsuhestyon nga kung mahimo tinluan ang higad sang dalan agud matawhay kag malimpyo ang lugar.
Indi man suno diri matuod nga masobra 100 nga puno sang saging ang ila natapas bangud suno diri sa iya pagkahibalo isa lamang ka puno ang iya ginpatapas sa iya opisyal kung sa diin ini ang nagahilay na sa dalan kag aminado ini nga may yara nasang bunga ang amu nga tanum.
Ginpahayag pa sini nga gina-obliga siya suno diri sang mag-asawa nga bayaran ang 100 nga puno sang saging butang nga iya ginpamatukan bangud suno diri indi man nila ini kaugalingon nga duta kag nagtubo lamang sa higad sang dalan ang mga puno sang saging.
Mensahe sini sa mag-asawa Denaga nga handa siya magbayad apang ang instakto lamang kag indi ang sobra-sobra.
