Wala sa agenda ni Pangulong Ferdinand Marcos Jr., nga magpatuman sang martial law kag term extension kasunod sang ginpatigayon nga reorganization sa National Security Council (NSC).
Ini ang reaksiyon ni Executive Secretary Lucas Bersamin sa alegasyon nga ginahaboy ni former Presidential chief legal adviser Atty. Salvador Panelo nga ang nasambit nga tikang sang Pangulo ang pagpreparar para magpatuman sang martial law sa pungsod rason nga ginkakas sini si VP Sara bilang panel sang National Security Council.
Ginhatagan-pagtamod ni Executive Secretary Bersamin nga nakapokus si Pangulong Ferdinand Marcos nga pabaskugon ang ekonomiya sang pungsod agud mag-asenso ang kabuhi, pabakuron pa ang mga programa nga nakatutok sa health and welfare sang mga pigado nga mga Pilipino kag kumpletuhon ang mga legacy projects.
Pahayag pa sini nga may kinamatarong ang Pangulo nga magpili kun sin-o ang luyag sini makaupod.
Ginbanatan man ni Bersamin si Panelo nga wala ini sang moral ascendency nga magsiling bangud sadtong siya ang yara sa pwesto sang tinalikdan nga administrasyon iya man ginsuhestiyon nga kakason bilang panel sang NSC si anay Vice President Leni Robredo.
