Ginhatagan pagtamod ni President Ferdinand “Bongbong” Marcos Jr. ang importansiya sang mas malapad nga kooperasyon sa India sa tunga sang madasig nga pagbag-o sa patag sang geopolitics kag ekonomiya sa rehiyon.
Sa iya speech sini nga Martes sa ceremonial reception sa Rashtrapati Bhavan, opisyal nga puluy-an sang Presidente sang India, ginpahayag ni Marcos nga panahon na agud padalumon pa ang koneksyon sang Pilipinas sa isa ka pinakadako nga ekonomiya sa kalibutan.
Suno kay Marcos, tinutuyo sang Pilipinas nga pasangkaron ang bilateral relations sa India, nga sa karon ginakilala bilang ika-apat nga pinakadako nga ekonomiya sa bug-os nga kalibutan. Ginpahayag man sang Presidente nga magatukod na sang isa ka “strategic partnership” ang duha ka pungsod.
Ang pagbisita ni Presiddent Marcos sa India kabahin sang iya lima ka adlaw nga state visit nga natalana nga matapos sa Biyernes, Agosto 8, kun sa diin ginalauman nga magapirma siya sa pila ka kasugtanan agud mapabakod ang kooperasyon sa tunga sang duha ka pungsod.
