Narekober sang technical divers sang Philippine Coast Guard (PCG) ang isa pa ka bangkay sang lalaki nga biktima halin sa naglugdang nga MV Trisha Kerstin 3 sang Sabado, Pebrero 14 sa kalalawran sang Baluk-Baluk sa Basilan.
Nakuha ang bangkay halin sa wreck site sa tunga sang nagapadayon nga underwater operations.
Bangud sini, nagsaka na sa 54 ang numero sang mga napatay sa trahediya samtang 25 pa ang nagapabilin nga missing. Una na nga ginpanubo sa 293 ang numero sang mga survivor sa insidente matapos ang masinsinan nga beripikasyon.
Samtang, nagapabilin naman nga buo ang promisa sang PCG sa pagpangita sa nabilin pa nga missing nga mga indibidwal subong man ang paghatag sang suporta para sa mga apektado nga pamilya sa ila nga pagpangita sang accountability kag hustisiya sa madulom nga trahediya.
