Bilang preparasyon sa Mayo 12 National and Local Elections, nagdeploy ang Philippine Army sang 329 ka mga suldado bilang contingency force agud mapabilin ang kalinong kag katawhay sa National Capital Region.
Ang contingency force ginabug-usan sang mga yunit gikan sa Civil Disturbance Management (CDM), K-9, Explosive Ordnance Disposal (EOD), Medical, kag Chemical, Biological, Radiological and Nuclear (CBRN) teams.
May kabug-usan nga 31 ka mga assets kaangay sang military trucks kag ambulansya ang naka-standby man para sa ano man nga contingency.
Magluwas diri, ang tanan nga Emergency Response Companies (ERCs) sang Philippine Army ang ginpaidalum sa Blue Alert Status humalin Mayo 11 tubtob Mayo 14, 2025 agud magresponde sa ano man nga insidente sa tion sang eleksyon.
Ang nagkalain-lain nga Philippine Army Major Units (PAMUs) nagpadala man sang 23,591 ka mga tinawo agud magtuman sang ila mga katungdanan sa eleksyon sa nagkalain-lain nga bahin sang pungsod, samtang 21,509 ka dugang nga mga tinawo ang yara sa standby alert status as of Mayo 9, 2025.
Sa katapusan, ginpahayag ni Army Chief Lt General Roy M. Galido nga komitido sila sa pagmentinar sang kalig-unan sang pungsod paagi sa padayon nga operasyon batuk sa mga grupo nga nagapamahog sa seguridad—samtang nagabulig man sa pagdul-ong sang mga materyales sa eleksyon kag pagsiguro sang kaluwasan sang mga tinawo sa eleksyon.
