ROXAS CITY – Nanindugan ang Philippine Navy nga wala nila gina-otorisa ang ila tropa nga maggamit sang pwersa para sa kadalag-an sang ila nga misyon magluwas na lamang kun kinahanglan na nga depensahan ang ila kaugalingon.
Ini ang ginpahayag ni PH Navy spokesperson for the West Philippine Sea Commodore Roy Vincent Trinidad kasunod sang barbaric ukon makahas nga mga aksyon sang pwersa sang China Coast Guard batuk sa mga tinawo sang Pilipinas samtang nagapatigayon sang resupply mission sa Ayungin shoal nga nagresulta sang kahalitan sa mga inflatable boat, mga gamit kag tinawo sang Philippine Navy kag ginkuha pa ang mga armas sang tropa sang Pilipinas.
Suno pa kay Comm. Trinidad nga sa pihak sang ginpakita sang mga barbarian nga CCG personnel, wala naggamit sang armas ang PH navy batuk sa CCG.
Ginpahayag pa sini nga ila gid ginatinguhaan nga indi maglab-ot sa punto nga ang tropa sang Pilipinas ang una nga magpalupok sang armas batuk sa CCG.
Gintawag man ni Comm. Trinidad nga band of barbarians ang CCG personnel bangud suno sa iya wala sang kinamatarong ang mga ini nga magsuksok sang uniporme bangud ginbutang sang mga ini sa peligro ang kabuhi sang PH Navy sa pihak sang responsibilidad sang mga ini nga siguruhon ang kaluwasan kag kalinungan sa kadagatan.
Ginpahayag naman sang China partikular ni spokesperson Gan Yu nga ang ila nangin tikang ang bilang control measures, bagay nga hugot nga ginakondinar sang mga opisyal sang Pilipinas kag mga kaalyado nga pungsod.
