Ginpahagan-hagan sang Philippine Army (PA) ang kahadlok sang publiko angut sa pag-mobilize sang mga suldado nga Amerikano kag Pilipino sa naaminhan nga bahin sang Luzon.
Suno kay Army spokesperson Col. Louie Dema-ala, indi dapat magkabalaka kon makita ang mga truck sang militar bangud kabahin ini sang bilateral large-scale logistics training sa tunga sang mga soldado sang Pilipinas kag Amerika.
Kabahin ini sang Exercise Salaknib Phase 2, gani suno sa iya wala ini sang pamahog sa publiko.
Ginpahayag sini nga natalana nga magpatigayon sang exercise ang Philippine Army kag US Army Pacific sa Lunes, Hunyo 16 tubtub Miyerkules, Hunyo 18 sa tuyo nga labi nga mapasanyog ang operational mobility, interoperability kag readiness sa tunga sang duha ka pwersa
Nagapakigbahin sa exercise ang 1,200 ka mga tropa sang Pilipinas kag Amerikano halin sa 5th Infantry Division sang PA kag 25th Infantry Division sang US Army.
Suno kay Col. Dema-ala, magabiyahe ang mga nagapasakop nga mga suldado sakay sa mga salakyan sang militar halin sa Fort Magsaysay sa Nueva Ecija pakadto sa Camp Melchor Dela Cruz sa Isabela, nga magaagi sa nagkalain-lain nga mga banwa sa sentral kag naaminhan sang Luzon.
Nagpanugyan ang tigpamaba sang PA sa komunidad nga maghalong sa pagmaneho malapit sa mga salakyan sang militar kag mangin aware sa presensya sang convoy sa mga dalanon.
