Isa ka bulan antes magsugod ang ikaduha nga termino ni Donald Trump bilang Presidente sang Estados Unidos, ginapreparar na sang mga konsulado sang Pilipinas sa Amerika ang ila mga serbisyo agud buligan ang mga undocumented nga Pilipino nga luyag magbalik sa Pilipinas.
Kasunod ini sang ginalauman nga lapnagon nga deportasyon kag hugot nga mga polisiya sa immigration sa idalom sang bag-o nga administrasyon.
Ginpakigbahin ni Consul General Senen Mangalile sang Philippine Consulate sa New York nga handa sila nga magbulig sa mga Pilipino nga posible maapektuhan sang mga bag-o nga polisiya.
Nagpain sang pondo ang Department of Foreign Affairs (DFA) pinaagi sa Assistance to Nationals (ATN) program agud mabuligan ang mga undocumented nga Pilipino sa gastos para sa ila ticket pabalik sa Pilipinas.
Ginpaathag ni Mangalile nga ang mga undocumented nga Pilipino sa Estados Unidos nga nagakinahanglan sang bulig para sa repatriation ang mahimo nga mangin kwalipikado nga makuha ang pondo gikan sa ATN. Ang mga interesado nga mag-avail sang bulig ang mahimo nga magbisita sa Assistance to Nationals Section sang konsulado, nga bukas halin Lunes tubtob Biyernes, 9:00 AM tubtob 5:00 PM, ukon mahimo sila nga makig-angut sa email sa newyorkpcg.atn@dfa.gov.ph. Para sa tion sang emerhensya, may ara man mobile hotline nga (917) 294-0196.
Ginpasiguro ni Mangalile sa mga Pilipino nga handa ang ila mga empleyado sa konsulado nga buligan ang mga ini sa pagproseso sang mga kinahanglanon nga dokumento para sa ila nga pagbalik sa Pilipinas. Dugang pa sini nga indi kinahanglan nga mahadlok ang mga undocumented nga Pilipino nga magpalapit sa konsulado para magpangayo sang bulig, kag wala suno diri sang mapriso sa pagpangayo sang bulig.
Sa record sang Department of Migrant Workers (DMW), ginabulubanta nga may 370,000 undocumented nga Pilipino ang nagaistar sa Estados Unidos. Ang pinakadako nga populasyon sang mga Pilipino ang makit-an sa anom nga estado sang California, Hawaii, New Jersey, Texas, Illinois, kag Washington DC.
