Gin-akusahan ni President Rene Gacuma sang Philippine Fencing Association (PFA) si Leyte Representative Richard Gomez sang pagpanakit.
Ginpahayag nga natabo ang insidente samtang yara sa Thailand ang delegasyon para sa subong nga 33rd Southeast Asian Games.
Suno sa sulat nga ginpadala ni Gacuma kay Philippine delegation chef de mission nga si Dr. Jose Raul Canlas, ginaalegar nga ginsakit kag ginmulay siya ni Gomez matapos gin-uyatan ang kamot sang kongresista, kasunod sang pagdaug sini sang silver medal sa iya event.
Sa baylo nga batunon ang handshake, ginpahayag nga gintapakan ni Gomez ang tiil ni Gacuma, ginkumos sang hugot ang kumalagko, kag ginpakamalaot ang presidente sang PFA.
Base sa panaysayon ni Gacuma, sang nakahalin ini, ginsundan siya ni Gomez kag ginsumbag sa liog.
Ginpahayag nga nag-ugat ang komprontasyon sa desisyon ni Gacuma nga islan ang national athlete nga si Alexa Larrazabal sa women’s individual epee event, bangud sa kapaslawan sini nga makasumiter sang nagakaigo nga mga dokumento, dalayon nga wala sa training, kag iban pa nga rason.
Suno kay Gacuma, plano man niya nga pasakaan sang kaso ang kongresista, apang sa subong nagakonsulta pa ini sa iya legal counsel.
